Do you believe Africa is yet to be fully documented?We do! And that’s why we developed Sewasew... Check it out!

loader
  • ቧልት

    @Gosa   1 year ago
    ጎሳ ሰው ነው።
  • loader Loading content ...
  • @Gosa   1 year ago
    ጎሳ ሰው ነው።
    ቧልት እንደ አሽሙር፣ አግቦ፣ ሽሙጥ፣ ፌዝ፣ ሾርኔ፣ ተረብ፣ ቀልድ እና ዋዛ የመሳሰሉትን ምድቦች ያካትታል። እነዚህም በንግገር በሰላምታና በጨዋታ ሰዓት በአንድ ሰው ላይ ሲሰነዘሩ እንደፍላፃ ልብን የሚወጉ ቃላት ናቸው። ነገር ግን ትርጉማቸው ለማንም ሰው በቀላሉ በቶሎ የሚገባ አይደለም፤ ሁል ጊዜ ሁለትና ሶስት አይነት ፍቺዎች ስለሚገኙባቸው ተራው ህዝብ የሚረዳው መጋረጃ ሆኖ ጎልቶ የሚገኘውን ሰም የምንለውን የመጀመሪያውን ክፍል ብቻ ነው። ጨዋታው ወይም ውዝግቡ አቻ ለአቻ የሆን እንደሆነ ከሁለቱም አዋቂዎች አንደበት የረቀቀ ሚሥጥር የተዳፈነበት ንግግር ይሰማል። ለምሳሌ፤

    • አለቃ ገብረ ሃና በተሾሙበት ደብር የሚያገለግል አንድ መልከ ጥፉ ፉንጋ ደብተራ ይኖር ኖሮ አንድ ቀን ይህ ሰዋ አለቃን ያለ ጫማ ሲሄዱ አያቸውና መምህር ምነው በባዶ እግርዎ ጫማ አይገዙም? ቢላቸው፣ እስቲ አንተ ፊት ግዛ እኛ ደግሞ ኋላ እንገዛለን አሉት ይባላል።
    • አንድ ታላቅ መስፍን እንደ ጥንቱ ልማድና ወግ ለመኳንንቱና ለሊቃውንቱ ግብር አግብተው ሲበላ ሲጠጣ ከአለቃ መልካሜ ኣጠገብ የተቀመጡ አንድ ባይተዋር ካህን በሳንሳ ከቀረበው ስጋ ኤየቆረጡ በመብላት ፋንት ወደ አኩፋዳቸው ይከቱ ኖሯል። በዚህ ነገር ሊቁ ተገርመው ምን ያለ ይሉኝታ ቢስ ሰው ነው እያሉ ሲያጉተመትሙ መስፍኑ፣ አለቃ እንግዳውን ይጋብዙ እንጂ አሉ። ጌታዬ ሰውዬው ሆዱን አሞታል አሉ። እንዴት እያደረገ? ቢሏቸው። ኧረ እየቆረጠ ያሥቀምጠዋል ሲሉ መለሱላቸው ይባላል።
    • አንድ የእጅ አመል ያለበት የቆሎ ተማሪ የመምህሩን ዳዊት ሰረቀና ጠፍቶ ሲኖር ከብዙ ጊዜ በኋላ እግር ጥሎት ከሰረቀበት ገዳም ተመልሶ አስተማሪውም ድንገት ስላገኙት ልጄ እንደምን አለህ ዛሬ ከየት ተገኘህ? ዳዊት ለመድገም ከገዳማችን መጣህ ወይ? አሉት ይባላል።
    • አንድ ችግረኛ ሰው አቅሙ በሚፈቅድለት መጠን ድግስ ደግሶ ዘመድ ወዳጁን ሲጠራ ጎረቤቱ የሆኑትንም አንድ መምህር አብሮ ጋበዛቸው። እኚህ ሰው ደህና ምግብና ጠጅ የለመዱ ስለሆነ የቀረበላቸው ጠላም ሆነ ወጡ እንደነገሩ ስለነበር፣ አልበላልህ አልጠጣልህ አላቸው። ለይምሰል ብቻ እንጀራውን እይቆረሱ ጣል፤ ሽክናውንም ከከንፈራቸው እያደረሱ መልሰው ቁጭ ያደርጉት ጀመር። ሰውዬውም ሁኔታቸውን ተመልክቶ ነገሩ ስለገረመው፣ ቀረብ አለና መምህር ይጋበዙ እንጂ? ምነው ቢላቸው፤ አለቃ አንገታቸውን ገደድ ፊታቸውን ፈገግ አደረጉና በገዛ ቤታችን መች ጋባዥ ያስፈልገናል፣ ቢሻን (በኦሮምኛ ውሃ) እንጠጣለን፣ ቢሻን እንበላለን አሉት ይባላል።

    ምንጭ:
    የብላቴን ጌታ ማህተመ ስላሴ ወልደ መስቀል ስብስብ ስራዎች
  • loader Loading content ...
  • @Tesfaw   9 months ago
    አመስግናለሁ ጎሳ ለመርጃው!

Load more...