Do you believe Africa is yet to be fully documented?We do! And that’s why we developed Sewasew... Check it out!

loader
  • ንግስተ ነገስት ዘውዲቱ (ምስኪንዋ ንግስት)

    @Tariku   2 years ago
  • loader Loading content ...
  • @Tariku   2 years ago
    ዘውዲቱ ከአባቷ ከአፄ ምኒልክ እና ከእናቷ ከወይዘሮ አብችው በእነዋሪ ከተማ ጅሩ ሚያዝያ 22 ቀን 1866 ዓ.ም ተወለደች። እድሜዋም ስድስት ዓመት ከመንፈቅ ሲሆን ያአስራ ሁለት ዓመት ዕድሜ ላለው ለአፄ ዮሐንስ ልጅ ለራስ አርአያ ሥላሴ ተዳረች። ይህም የሆነበት ምክንያት በጽዮኑ መንበር በተቀመጠው አፄ ዮሐንስና በይሁዳ አንበሳ ስርዎ መንግስት መንበር ላይ ለመቀመጥ በሚጠባበቁት ዳግማዊ ምኒልክ መካከል መግባባትን ለመፍጠር ተብሎ እንደነበር ይነገራል።


                   ንግስተ ነገስት ዘውዲቱ

    እራስ አርአያ ሥላሤም ከዚህ አመት በሞት ሲለይ የአዲስ አበባውን ፊታውራሪ ውቤ አጥናፍ ሰገድን አግብታ አራዳ ባለው አሁን ዳጃች ውቤ ቤት ወይም የአዲስ አበባ የባህል ምግብ ቤት የሚባለው ውስጥ ትኖር ነበር። ሆኖም አንድ ቀን ወይዘሮ  ዘውዲቱ ፊታውራሪ ውቤ በጥፊ ሲመቷት ተናዳ በማግስቱ ጧት ጠፍታ ሄዳ ላአባቷ ለአፄ ምንሊክ ትናገራለች። አፄ ምኒልክም ፊታውራሪ ውቤን አስጠርተው "ምነው መታ ኸኝ " ብለው ጠየቇቸው። ፊታውራሪም ደንግጠው መልስ ባያገኙም አፄ ምኒልክ በትልቁ እጃቸው በጥፊ ብለው ወደቤታቸው ላኯቸው። ወይዘሮ ዘውዲቱም ወደቤቷ መመለስ ስላልፈለገች ተፋቱ።  ዘውዲቱ  ቀጥሎም  የጎንደር ገዥ ና  የእቴጌ  ጣይቱን  ይወንድም  ልጅ  ራስ  ጉግሣ  ወሌን  ገባች ።  አብረውም  አሁን  አዲስ  አበባ  ፣  ዑራ ኤል  ቤተክርስትያን አካባቢ  ፣    የአዲስ  አበባ  ከተማ  አስተዳደር  የጤና  ጥበቃ  ሮ  ያለበት  ቦታ  ላይ  ይኖሩ  እንደነበር  ይነገራል

    ዘውዲቱ ከሦስቱም ባሎችዋ ልጅ አልወለደችም። አባትዋ አፄ ምኒልክ እንደታመሙ እርሳቸውን ለማስታመም ቤተ መንግስት መጥታ አብራቸው መኖር ጀመረች። ዓጼ ምኒልክ ታህሳስ 3 1906 ዓ.ም ቢሞቱም የመሞታቸው ሁኔታ ይፋ ስላልሆነ ቤተ መንግስት ውስጥ ቆይታ የአፄ ምኒልክ የልጅ ልጅ አቤቶ ኢያሱ በጥር ወር 1908 ዓ.ም እቴጌ ጣይቱን ከቤተ መንግስት በግዞት ወደ እንጦጦ ሲልካቸው እሷንም ርስቷ ወደ አለበት ወደ ሸዋ ፉሌ ላካት።

    አቤቶ ኢያሱን ከመንግስት ስልጣን ለማውረድ በመኯንንቱ በኩል ስምምነት ቢደረስም እርምጃ ለመውሰድ ህዝቡ ይእምየ ምኒልክ ተዋላጅ ከሥልጣን መውረዱን ይቃወማል ተብሎ ስለተፈራ ወይዘሮ ዘውዲቱ ንግስተ ነግስት እንዲሆኑ ታጩ። ሹመቱንም ተቀብለው በ43 አመት እድሜያቸው ዙፋን ላይ ተቀመጡ። ንግስተ ነግስት ዘውዲቱ መንፈሳዊነታቸውን የሚያጠብቁ ስለሆኑ ባለቤታቸውን ራስ ጉግሣ ወሌን ትተው በብትህና ለመኖር መርጠዋል ተባለ። ራስ ጉግሣም ጎንደር እንደገና ተሹመው ከቤተ መንግስት እንዲርቁ ተደረገ። ደጃች ተፈሪ መኮን (በሇላ አፄ ኃይለ ሥላሴ) ራስ ተብለው እና አልጋ ወራሽ ሆነው ተሾሙ። 



                    ንግስተ ነገስት ዘውዲቱ

    ፖለቲካውን ለመምራትም ሆነ ዘመናዊ ሥልጣኔን ለማስፋፋት ተፈሪ ለሚያደርጉት ጥረት ሁሉ ንግሥት ዘውዲቱ እንቅፋት አልሆኑም። የልቁንም በበኩላቸው ቤተ ክርስትያን ሲያሰሩና ሲያሳድሱ ፣ በተጨማሪም የቅዱስ ጊዮርጊስ ትምህርት ቤትንና የንግስት ዘውዲቱ ማዋለጃ ሆስፒታልን ማሰራት ላይ ትኩረታቸውን አደረጉ። የሚከተሉትም ካሰሩዋቸው ቤተክርስትያኖች ውስጥ ይጠቀሳሉ።
    • አዲስ አበባ ውስጥ የሚገኙ
      • ቅዱስ ዑራኤል
      • የታዕካ ነግሥት ባዕታ ለማርያም
      • ጴጥሮስ ወጳውሎስ
      • ደብረ አሚን ተክለ ሃይማኖት
      • ቂሮቆስ
      • ቅዱስ ዮሴፍ ወኒቆዲሞስ
      • ደብረ ነግስት ቁስቇም
    • አዲስ አበባ ውጭ የሚገኙ
      • ፉሌ መድኃኔአለም
      • መናገሻ ማርያም
      • የረር ቅድስት ሥላሴ
      • ጀርሳለፎ ቅዱስ ገብርኤል
      • አዋሽ ቅድስት ማርያም
      • አድአዘርጋ አቡነ ተክለኃይማኖት
      • ሜታ የወረብ ቅድስት ማርያም


                   ዘውዲቱ ሆስፒታል

    ንስግስት ዘውዲቱ አባታቸው አፄ ምኒልክ የምእራባውያንን ስልጣኔ ወደ ኢትዮጵያ ለማምጣት የነበራቸውን ፍላጎት በሚገባ የተገነዘቡ ስለነበሩ በበኩላቸው ትምህርት እንዲስፋፋ አዋጅ አወጡ። አዋጁም እድሜው ከ7 እስከ 21 አመት ድረስ ይሆነ ልጅ ያለው 1ኛ) የንባብና የፅሕፈት ትምሕርት ፣ 2ኛ) በአገራቸን ካለው የእጅ ሥራ ውስጥ ልቡ የወደደውን ለልጁ እንዲያስተምር የሚደነግግ ነበር። ካላስተማረ ግን 50 ብር ቅጣት እንዲቀጣ የሚልም ነበር። ይህንንም የመቆጣጠሩ ሃላፊነት የንሥሐ አባት ፣ የገጠር መሪጌታ እና የደብር አለቃ ሁሉ ግዴታ ተጥሎባቸው ነበር።

    ንግስቲቱ ስልጣኔን ልጠቀም ብለው ሳያስቸግሩ ለ12 አመት ከግማሽ አልጋው ላይ ቢቀመጡም አልጋ ወራሹ ራስ ተፈሪ የንግስት ዘውዲቱን ደጋፊዎች በማግለልና የራሳቸውን ደጋፊዎች በየቦታው በመሾም ኃይላቸውን አጠናክረው የመንግስቱን ስልጣን ለመውሰድ እየተዘጋጁ ይሄዱ ጀመር። ተፈሪንም ለማንገስ ውስጥ ውስጡን በደጋፊዎቻቸው ሢጠነሠስ ከቆየ በሇላ ቀኝ አዝማች ባንትይዋሉና ግራዝማች ይገዙ የሚመሩት ቡድን ንግስተ ነገስት ዘውዲቱን "ራስ ተፈሪን ያንግሱልን" ብለው ሲጠይቁ "እስቲ ልዋል ልደርና መክሬ መልሱን እሠጣችሇለሁ" ሲሉ ቢመልሱላቸውም "አይሆንም አሁኑኑ መልሱን ካልሰጡን" ብለው ሰቅዘው ያዙዋቸው። ንግስተ ነግስትም ነገሩ ስለገባቸው የነበራቸው አማራጭ መስማማት ብቻ ነበርና ተስማሙ። ስለሆነም ራስ ተፈሪ ንጉስ ተፈሪ ተብለው መስከረም 27 ቀን 1921 ዓ.ም ዘውድ ደፉ።

    ከዚህ ሹመት በሇላ ግብር በሁለት ቦታ እየተበላ ሰው እየተከፈለ ንግስቲቱና አዲሱ ንጉስ መካከል ውስጥ ውስጡን አለመግባባት እየፈጠሩ ሄዱ። ቅሬታ አሳይተው የነበሩትን የንግስቲቱን የበፊት ባልና የጎንደሩን ገዢ ራስ ጉግሣ ወሌንም ማስወገድ አስፈላጊ ሆነ። ራስ ጉግሣ ወሌም ወደ አዲስ አበባ ሲጠሩ አኩርፈው ለመምጣት ባለመቻላቸው በነደጃች ሙሉጌታ የሚመራ ጦር ዘመተባቸው። በዚሁም ውጊያ ቇና አንቺም ላይ ራሳቸውን በጎራዴ ተመተው ተገደሉ። ንግስት ዘውዲቱም ከራስ ጉግሳ ወሌ ሞት በሇላ በሁለተኛው ቀን መጋቢት 24 ቀን 1922 ዓ.ም ከዚህ አለም በሞት ተለዩ።  ንግስተ  ነግስት  ልጅ  ስላልነበራቸው  መሬታቸውንና  ንብረታቸውን  ልት  ተናኘ  ወርቅ  እንዲወርሱ  ተደረገ  

    ምንጭ :
    • የ20ኛው ክፍለ ዘመን ኢትዮጵያ፣ በጥላሁን ብርሃነ ሥላሴ
    • የኢትዮጵያ ረጅም የህዝብና የመንግስት ታሪክ ፣ በዶክተር ላጵሶ ጌ. ድሌቦ

  • loader Loading content ...

Load more...