Do you believe Africa is yet to be fully documented?We do! And that’s why we developed Sewasew... Check it out!

loader
  • ጢግ ጉላ - በሀዲያ ማህበረሰብ የጥል፣ የበቀልና የጸጸት ስሜትን የማንጻት ባህላዊ ስነ ስርዓት

    @Kemal   2 years ago
  • loader Loading content ...
  • @Kemal   2 years ago
    በሀድያ ማህበረሰብ የጢግ ጉላ (Xiiguulla) ስነ ስርዓት የጥል፣ የበቀልና የጸጸት ስሜትን በማንፃት ወደ ሰላማዊና ጤናማ ግንኙነት የመመለስ ስነ ስርዓት ነው። በተለይም በግድያ ወንጀል ገዳይ የወገኑን ደም በማፍሰሱ ከፍተኛ ኃጢአት እደሰራ ስለሚቆጠር ይህ የተወገዘ ተግብር በሀድያ ሴራ (ባህላዊ የአመራር ደንብ) ሊነፃ የሚችለው በጢግ ጉላ ነው ተብሎ ይታመናል። በመሆኑም የጢግ ጉላ ስርአት ለሟች ቤተሰብና ለገዳይ እና ቤተሠቦቹ የስነ ልቦና ፈውስን ይሠጣል።


     

    የዚህን ስነስርአት ሙሉ ወጪ የገዳይ ወገን የሚሸፍን ሲሆን በአጠቃላይ የጢግ ጉላ ስነ ስርአት የሚከተሉትን ሶስት ዋና ዋና ደረጃዎች ያቀፈ ስርአት ነው።
    1. ከሰፈር ወጣ ባለ ወንዝ ወይም የተገለለና አስፈሪ ጫካ ወይንም ቁጥቇጦ ውስጥ የሚፈፀም ስነ-ስርአት
    2. በሟች ቤት ውስጥ የሚፈፀም ስነ ስርአት
    3. እርቅና የሰላም መውረድን አስመልክቶ የሚዘጋጅና ለአንድ ሙሉ ቀን የሚዘልቅ የግብዣና የአብሮነት ጊዜ ናቸው




    የጢግ ጉላ ስነ ስርአት የመጀመሪያው ስነ ስርአት የሚደረገው ከሰፈር ወጣ ባለ ወንዝ ወይም የተገለለ አስፈሪ ጫካ ወይም ቁጥቇጦ ሲሆን ይህም ቦታ የጠመረጠበት ምክንያት በግጭት ምክንያት በሁለቱ ወገኖች ላይ የገባውን የፀፀት፣ የበቀልና የጥላቻ መንፈስ ለማባረር ነው። የሰፈር ውጪ እና የቤት ስነስርአቱም እንድሚከተለው ቅደም ተከተል ይካሄዳል።
    • ስነስርአቱን ለመፈፀም ጉዳዩን የያዘው የሴራ መዋቅር ዳኞች ፣ የአካባቢው ታዋቂ ሽማግሌዎች፣ ገዳይና የሟች የቅርብ ምትክ፣ የገዳይና የሟች የቅርብ ቤተሰቦች በንጋት ወደ ጢግ ጉላ ስነ ስርአት መፈፀሚያ ቦታ ይሄዳሉ። በዚህም ጊዜ ገዳይ ከሟች የቅርብ ቤተሰቦች ጋር ፊት ለፊት በሚገናኝበት ጊዜ ድንገት በስሜታዊነት ወደ እርቅ የሚደረገውን ጉዞ የሚያደናቅፍ ነገር እንዳይከሰት የሟች ቤተሰቦች በታዊቂ ሽማግሌዎች ምክር ይሠጣቸዋል። ገዳይ ደግሞ ወደዚህ ስነስርአት ሲመጣ መፀፀቱን ለመግለፅ ፀጉሩን ተላጭቶና ጭንቅላቱንና ፊቱን በጥቁር ልብስ ተሸፍኖ መሆን ይጠበቅበታል።
    • ስነስርአቱ ሲጀመር የሟች ቤተሰቦች ገዳይ ያመጣውን ዌየካ (ቡልኮ) እንዲለብሱ ከተደረገ በሇላ ገዳይ ያቀረበውን ጥቁር በግ አርዶ ሆድ እቃውን በመተርተር ትንሹን አንጀት አውጥቶ እንዲያስቀር ተደርጎ የተቀረውን የበግ አካል ወደ ወንዙ ወይም ወደ ጫካው ይጣላል።
    • ከዚህያም የትንሹ አንጀት አንደኛው ጫፍ በገዳይ ሌላኛው ደግሞ የሟች ወራሽ ወይም ምትክ ተብሎ በሚታሰበው ሰው እግር ላይ ይታሰራል። ከዚያም መሃሉ በፋጋ እንዲቆረጥ ይደረጋል። በዚህ ተግባር በወገኖች መካከል የተዛመተው የበቀልና የጥል መንፈስ እንደተቆረጠ ይቆጠራል።
    • ከዚያም ገዳይ በአጠገቡ ባለው ወንዝ ገላውን እንዲታጠብ በማድረግ ወንጀሉን ከፈፀመ ቀን ጀምሮ በሀዲያ ህዝብ ዘንድ እንደ ሀትያጠኛ ይቆጠር የነበረበትን ዘመን አብቅቶ ወደ ምህረትና ንፅህና ዘመን ይሸጋገራል።
    • ከላይ የተጠቀሱት ስነ ስርአቶች እየተፈፀሙ እያሉ ወደ ጢግ ጉላ ስነ ስርአት የታደሙት ሴቶች ወደ ስፍራው ተይዞ የተሄደውን ጥቁር ማር በውሃ በመጥበጥ ውህዱን ወይም በረከቱን በገዳይና በሟች ወራሽ ወይም ምትክ ላይ ይረጫሉ።
    • የዚህን ከመንደር ወጣ ብሎ የሚካሄደውን ስነ ስርአት የጉዳዩ አስፈጻሚ የሆነው የሴራ መዋቅር መሪዎችና የአካባቢው ሽማግሌዎች የታረደውን በግ ደም በውሃ በመበረዝ እየረጩ ለሰላም ፣ ለእርቅና ለስርየት በሚያደርሱት ፀሎትና እሱን ተከትሎ በገዳይ እና በሟች ቤተሰቦች መካከል በሚደረግ የሰላምታ ልውውጥ ይጠናቀቃል።
    • የውጭው ስነስርአት ከተጠናቀቀ በሇላ ቀጣይ የጢግ ጉላ ስነስርአትን ለመፈፀም በስፍራው የነበሩት ሁሉም ተሳታፊዎች ጉዞቸውን ወደ ሟች መኖሪያ ቤት ያደርጋሉ።
    • ወደ ሟቹ ቤት ደጃፍ ሲደርሱም በቤቱ በራፍ ላይ ገዳይ ለወንጀሉ መፈፀሚያ የተጠቀመበትን መሳሪያ ለምሳሌ፣ ጦር እንዲጋደም ተደርጎ መሳሪያውን ገዳይ ዘሎ በማለፍ ወደ ቤት እንዲገባ ይደረጋል። ይህንንም በማድረግ ተመሳሳይ ወንጀል እንደማይፈፅም ያረጋግጣል።
    • ከዚያም ሁሉም ሰው ከራሳቸው ፀጉር ጀምሮ ተከናንበው ጨለማ ወደ ሆነው ቤት ውስጥ ይገባሉ። ይህ ታላቅ ጨለማ ከሞት አደጋ መከሰት ጀምሮ በሁለቱም ወገኖች መካከል የቆየውን ከበድ ያለ መለያያት ፣  የጥላቻ ስሜትንና የወንጀሉን አስከፊነት ያንፀባርቃል።
    • በዚህ ከባድ ጨለማ የፀጥታ ሁኔታ እርቁን የሚመሩት መሪዎች ለሁሉም ተሳታፊ በሚሰማ ድምፅ የሚከተለውን ቅደም ተከተል ያለውን ጥያቄና መልስ በመለዋወጥ የእርቁን ስነ ስርአት ያስፈፅማሉ።
      • ዋእ ጫክ ፎቆዮኔ (የእግዚአብሄር ብርሃን አያበራም ወይ)? ፤ ፎቅኮ (ያበራል) - በዚህ ጊዜ ቤት ውሥጥ መብራት ወዲያውኑ ይበራል። የገዳይ ወገኖችም እንደተከናነቡ መቀመጫ ፈልገው ይቀመጣሉ።
      • ጉንጉእል ድሎዮኔ (ክንብንቡ አይዎርደም ወይ)? ፤ ድልኮ (ይዎርዳል) - በዚህ ጊዜ የገዳይ ወገኖች የተሸፋፈኑትን ክንብንብ አውርደው ተገልጠው ይቀመጣሉ።
      • ዋእ ዎግ ቤዶዮኔ (የእግዚአብሄር ስርአት አይፈፀምም ወይ)? ፤ ቤዶና (ይፈፀም) - በዚህ ጊዜ ገዳይ ቡላ በግ እንዲያቀርብ ይታዘዛል። በጉንም ትንሹን አንጀት በማውጣት አንዱን ጫፍ በገዳይ ሌላኛውን በሟች ወራሽ ወይም ምትክ እግር ላይ በማሰር በዚህ ዙር ሽማግሌዎች መሃል ላይ አንጀቱን በመቁረጥ የእርቅ መንፈስ እንደሰፈነ ያረጋግጣሉ።
    • ቀጥሎም ገዳይ ከጠቀመጠበት በመነሳት በቤቱ መሃል በሁለቱ ወገኖች መካከል በተተወው ባዶ ቦታ ላይ ያመጣውን ስጦታ ይዞ ይቆማል። በሽማግሌዎች ዛዝም ያመጣውን ስጦታ የሟችን አባት ጉልበት እና የሟችን እናት ጡት በመሳም የሰቸዋል
    • ከዚህም በመቀጠል ሽማግሌዎቹ ሁሉም ሰው ተነስቶ ተቃቅፎ ከልብ እንዲሳሳም በማድረግ እርቁን ይፈፅማሉ። በዚህ ጊዜም ሴቶች ያዘጋጁትን አንጩታ በሁሉም ተሳታፊዎች ላይ በሽማግሌዎች አማካይነት ይረጫል።
    • በመጨረሻም ለእርቁ ስነ ስርአት ታዳሚዎች ለአንድ ቀን የሚዘልቅ የግብዣና የአብሮነት ስነስርአት ይደረጋል።

    ገዳይ ከጢግ ጉላ ስነስርአት በሇላ የሟች ቤተሰብ አንድ አባልና የሟች ተተኪ ነው ተብሎ ስለሚታሰብ ቀድሞ ሟች ለቤተሰብ ይሰጥ የነበረውን አገልግሎት አሁን በፍቅርና በቤተሰብነት ስሜት ይሰጣል። እውነተኛ ፍቅርና ሰላምም በተለያዩ የአብሮ መሆን ክስተቶች እየተጠናከሩ ይሄዳሉ። 


    ምንጭ   
    • የሀድያ ህዝብ ታሪክና ባህል (አለባቸው ኬዕሚሶ እና ሳሙኤል ሀንዳሞ)

  • loader Loading content ...

Load more...