loader

Topics (48)


loader Loading content ...

Explanations (53)


  • @ሊ/ትጉሃን እምሩ   6 months ago
    በመፅሃፈ መክብብ ስፍረው የሚገኙት የሰው ህይወት አጭር ከመኖኑም በላይ ውጣ ውረድና ውዝግብ ፣ የተወሳሰበ ፍርደ ገምድልነትና መታከት የሞላበት መሆኑን ከመረዳቱ የተነሳ "የሰው ህይወት ከንቱ ነው" ብሎ የደመደመ የአንድ ፈላስፋ አሳቦች ናቸው። ይህ ፈላስፋ የሰዎችን የኑሮ አቅጣጫ የሚቆጣጠረውን የእግዚአብሔርን አሰራር ለመረዳት ተስኖታል ፤ ይሁን እንጂ በሚኖሩበት ዘመን ሁሉና በተቻላቸውም አቅም በትጋት መስራትና በእግዚአብሔርም ስጦታዎች መደሰት እንዳለባቸው ለሰዎች ምክር ይለግሳል።

    ከፈልስፋው አሳቦች አብዛኛዎቹ ተቃራኒ አመለካከት ያላቸውና በተስፋ መቁረጥ ስሜት የተሞሉ ናቸው ፤ ይሁን እንጂ ይህ መጽሃፍ በመፅሃፍ ቅዱስ ውሥጥ መገኘቱ በመፅሃፍ ቅዱስ ላይ የተመሰረተው እምነት ሌላው ቀርቶ ይህን ተቃራኒ አሳብና ጥርጣሬ የተሞላበትን መፅሃፍ ጨምሮ እስከሚይዝ ድረስ ሰፊ መሆኑን ያስገነዝባል። ይህ የመክብብ መፅሃፍ የሰውን ይህወት እንደ መስታወት ስለሚያሳይ ብዙ ሰዎች ከዚህ መፅሃፍ መፅናናት አግኝተዋል። እንዲሁም እነዚሁኑ አሳቦች የሚያሳየው ይኸው አንዱ መፅሃፍ ቅዱስ ለህይወት ታላቅ ትርጉም በሚሠጠው እግዚአብሄር ተስፋ ማድረግ እንደሚችሉ የሚመክር መሆኑን ተረድተዋል።

    ምንጭ:
            መፅሃፍ ቅዱስ ፣ ቀለል ባለ አማርኛ የተተረጎመ (የኢትዮጵያ መፅሃፍ ቅዱስ ማህበር ፣ አዲስ አበባ ፣ 1980 ዓም ፣ የመጀመሪያ እትም)
  • loader Loading content ...
  • በቅዱስ ኪዳን ጸንታ የኖረችው ጥንታዊቷ ኢትዮጵያ ቀደም ብላ ከኪዳነ ልቦና ወደ ኪዳነ ኦሪት ተሸጋግራ ከቆየችበት እምነቷ በሚስጥረ ጥምቀት ለክርስትና እምነት ማለትም ለኪዳነ መንፈስ ቅዱስ የበቃችው ከክርስቶስ ልደት በኋላ አርባ አመት እንኳን ሳይሞላ መሆኖ እየታወቀ በወንጌል ያመነችውና ቤተ ክህነቷ 'ቤተ ክርስትያን' ተብላ እንደ አዲስ የተቋቋመችው ክርስቶስ በተወለደ በአራተኛው ምዕተ ዓመት እንደሆነ የሚያስመስል የሐሰት ይትብሃል ሠርጎ እንዲገባ ተደርጎ እንደነበር መረጃዎች ያስረዳሉ።

    ይህም 'የኢትዮጵያ ቤተ ክርስትያን' በሚለው መደበኛ ተገቢ በሆነው ስያሜ መኻከል ቢያስፈልግ እንኳ 'ተዋሕዶ' የሚለውን የራስ ቃል ማከሉ የሚበቃ ሲሆን የዚሁ የባዕዱ ይትብሃል ጠንቀኛ ውጤቶች የሆኑትን 'Coptic (ኮፕቲክ)' እና  'Orthodox: (ኦርቶዶክስ)' የተባሉትን የግብፅና የግሪክ የሃማኖት መለያ የሆኑትን ቃላት በተቀፅላነት በመጨመር 'የኢትዮጵያ Coptic ኦርቶዶክስ ቤተ ክርስትያን' ወይም 'የኢትዮጵያ Orthodox ተዋህዶ ቤተ ክርስትያን' የሚለው አጠራር ፀንቶ እንዲቀጥል ተደርጓል።

    Coptic 'ኮፕቲክ (ቅብጥ)' የሚለው ቃል 'ግብፅ' ማለት ሲሆን፣Orthodox 'ኦርቶዶክስ' የሚለው ቃል  ደግሞ ግሪከኛ ሆኖ ትርጉሙ 'የቀናች ሃይማኖት' ማለት ነው። እነዚህን ቃል መጠቀሙ በማንም ዘንድ ቅር የማያሰኝ ቢሆንም፣ ይህ አጠራር የኢትዮጵያ ቤተ ክህነት በዓለም አብያተ ክርስቲያናት ዘንድ ያላትን የቀዳሚነት ደረጃ በመሻር 'የግብፅ ወይም የኦርቶዶክሳውያን' ማለትም 'የግብፅ ወይም የግሪክ ከሁለቱ አንደኛቸው ቅኝ' መሆኗን ለማረጋገጥና ባዕድ የሆነው አላማ በቀላሉ ከግብ ለማድረስ እንዲያመች ሆን ተብሎ በእቅድ የተቀነባበረ መሆኑ መረጃዎች ይናገራሉ። 

    በዚሁ 'ኦርቶዶክስ' ከሚለው ቃል የተነሳ ኢትዮጵያ በነገረ መለኮት ሃይማኖታዊ አቋሟ የተነሳ ቤተክርስትያኗ ከካቶሊኮች ጋር ተመሳሳይ በሆነው በግሪኮች ኦርቶዶክሳዊ እምነት ላይ እንደተመሰረተች ሆና እንድትቆጠር እያረገ መሆኑን  በመገንዘብ ኢትዮጵያውያን የኋላ ኋላ 'ተዋሕዶ' የሚለውን የግእዝ ቃል ቢቸግራቸው በመጠሪያ ስሟ መካከል ተጨማሪ እንዲሆን አድርገው ሃይማኖታቸው የቆመበትን መሠረት ለጊዜው ከእነዚሁ ጠንቆች ለማዳን እንዳደረጉት ያስገነዝባሉ። ቃሉም የእግዚአብሔር ልጅ በፍፁም ሰውነት ስለመገለጡ ቤተ ክርስትያኗ ያላትን 'የሚስጢረ ስጋዊ' ሃይማኖታዊ አቋም በትክክል ለማስረዳት የተጨመረ ቃል ነው።

    ምንጭ     
    ኢትዮጵያ እና ኢትዮጵያዊነት፣ ሁለተኛ መፅሃፍ (ንቡረ ዕድ ኤርምያስ ከበደ ወልደ ኢየሱስ) 
  • loader Loading content ...
  • በኢትዮጵያውያን አዲስ አመት መጀመሪያ ከሆነው ከመስከረም 1 ቀን የልደት በአል በፊት በኢትዮጵያ ኦርቶዶክስ ቤተ ክርስትያን ዘንድ የዓመቱ የመጨረሻ ታላቅ በአል ፍልሰታ ለማርያም ሲሆን፣ እርሱም ከነሓሴ 1 እስከ ነሓሴ 16 ቀን ድረስ በሚቆየውና ካህናት፣ ትላልቆች ወንዶችና ሴቶች፣ ጨቅላ ልጆችና ብላቴኖች ብቻ ሳይሆኑ ኅጻናት ጭምር እየፆሙ እያስቀደሱና እየቆረቡ በቤተ ክርስትያን በሚያሳልፉት የሁለት ሳምንት ሱባኤ ፍፃሜ ላይ የሚከበር በዓል ነው። በዚህም ሱባኤ ቅዱሳን ሓዋርያት የህን ሱባኤ ለምን እንደጀመሩት በአመቱም እንዴት እንደቀጠሉት ዝክረ ነገሩ ይወሳል።

    የአመጣጡ ዝክረ ነገርም በጥር 21 ቀን ከሆነው ከቅድስት ድንግል ማርያም እረፍት በኋላ ተያይዞ የሚነገረው ትንሳኤ ዜናዋ ሲሆን የሚወሱት ዋና ዋና ድንቅ ነገሮች የሚከተሉት ናቸው።
    • በጥር 21 ቀን ከሆነው ከድንግል ማርያም እረፍት በኋላ አይሁድ በተለመደ ጠላትነታቸው አስከሬኗን "እናቃጥላለን" ማለታቸው፤
    • በዚያን ጊዜ ግን እግዚአብሔር ወልድ ሰው ሆኖ የተፀነሰበት፣ እስኪወለድ የኖረበትና ጠብቶ በእቅፏ ያደገበት መቅደስ ሥጋዋ እንደታቦት ፅዮን ሰብአዊ ፍጡር ሊነካው የማይችለው ስለሆነ በቅዱሳን መላእክት ተነጥቆ ወደገነት መወሰዱ፤
    • ወንጌላዊው ዮሐንስ ይህንኑ ምስጢር ያየ ሲሆን ሌሎች ሐዋርያት ባለማየታቸው በነሓሴ 1 ቀን ሱባዔ መግባታቸውና ምስጢሩ ተገልጦላቸው ቅዱስ ስጋዋን እንደገና ተቀብለው በነሓሴ 14 መቅበራቸው፤
    • በሦስተኛው ቀን የልጇ ትንሳኤ ባስገኘው በአዲሱ የትንሳኤ አካል እንደእርሱ ከሙታን ተለይታ መነሳቷና ማረጓ፤
    • ልጇ ጌታችን እየሱስ ክርስቶስ ለትንሳኤና ለዕርገት በኩርና ቀዳማዊ ሆኖ እርሷ ለዚያ ለትንሳኤውና ለእርገቱ ብኩርናና ቀዳሚነት ዳግማዊትና ተከታይ ለመሆን የበቃችበትን ያን የመለኮት ድንቅ ስራ እርሷም ያገኘችውን ክብር በዚያን ጊዜ ቀዳማዊ ሆኖ ለማየትና ምስክር ለመሆን ከሃዋርያት መካከል የታደለው ለጊዜው ሃዋርያው ቶማስ ብቻ ስለነበር ከዚህ የተነሳ "ቶማስ ትንሳኤሽንና እርገትሽን አይቶ እኛ ለዚህ እድል እንዴት ሳንበቃ እንቀራለን?" በማለት ሃዋርያት አዝነው በአመቱ ሁሉም ቶማስ ጭምር በነሓሴ 1 ቀን ለሁለተኛ ጊዜ ሱባኤ መግባታቸው።
    • በመጨረሻም ነሓሤ 16 ቀን በሚውለው በትንሳኤዋ መታሰቢያ እለት ሃዋርያት ወደሰማያዊቷ የእግዚአብሔር መንግስት ተነጥቀው ቅድስት ድንግል ማርያም የምትገኝበትን ክብርና ምስጋና ማያታቸው።
    • እዚያ መንበረ ፀባኦት ልጇ ኢየሱስ ክርስቶስ እርሷን እናቱን ቅድስት ድንግል ማርያምን መንበረ ራሱን ሰራፂ ቄስ ሊቀ ሃዋርያት ጴጥሮስን ረዳት ካህን ቀዳሚ ሰማዕት እስጢፋኖስን ሰራዒ ዲያቆን አድርጎ ቀድሶ እርሱ ራሱ ተቀብሎ እናቱን ማቀበሉ እነርሱን ሃዋርያትንም ማቁረቡ ናቸው።

    እግዚአብሔር በድንግል ማርያም ሰውነት የፈፀማቸው እኒህ ድንቅ ስራዎቹ ቀደም ብለው በሱባኤው እለታት በየአርእስቱ ተከፋፍለውና በዝርዝር ተተንትነው የሚነገሩ ከመሆናቸው ጋር በተለይ በዚች በዓል ላይ ተጠቃለው ይወሳሉ። በዚህ በዓል ላይ "ተንሥአት እሙታን ማርያም ድንግል! ከመ ትንሣኤ ወልዳ ዘልዑል" ማለትም "ድንግል ማርያም ከሙታን ተለይታ ተነሣች! ይህውም ልዑል አምላክ ልጇ እንደተነሳው ትንሳኤ ነው!" የሚለውን የምስራች ቃል ምእመናን ይለዋወጣሉ። ይህ የደስታ መንፈስና ስርአት እንደልጇ ዘመነ ትንሳኤ እስከ ነሓሤ 21 ቀን ድረስ ይቀጥላል።


    ምንጭ
    ኢትዮጵያ እና ኢትዮጵያዊነት (በንቡረ እድ ኤርምያስ ከበደ ወልደ ኢየሱስ )
  • loader Loading content ...
  • ከሣቴ ብርሃን ተሰማ የአማርኛ መዝገበ ቃላት ላይ ሰምና ወርቅን በሚመለከት የሚከተሉት ገለፃዎች ተቀምጠዋል።
    • ሰም እና ወርቅ አንጥረኛ ወርቁንና ብሩን እያፈሰሰ ልዩ ልዩ የጌጥ ዕቃን ለመስራት ሲያስብ ሰሙን አቅልጦ በልዩ ልዩ ጌጥ ወይም የሰሙን ምስል ነቅሶ የወርቁንና የብሩን ቅላጭ በሰሙ  ንቅስ ውስጥ አፍስሶ በወናፍ አናፍቶ ያንን አግሎ ሲያወጣው ያንኑ የሰሙን ልዩ ልዩ ንቅስ መልክ ይዞ የሚወጣበት የጥበብ መንገድ ነው።
    • ሰም ለበስ - ሰም ለበስ ግጥም የሚባል የአማርኛ ግጥም የተነገረለትን ኀይለ ቃሉን ሰውሮ ምስጢሩን በሚያስረዳ ሰም ለበስ ግጥም ገጥሞ ያንኑ ግጥም በንባቡ ኀይለ ቃሉን ማስረዳት ነው።
    • ሰምና ወርቅ ለበስ ንግግር - አማርኛ ልዩ ልዩ የሙሻ ዘር ምስጢር ንግግር አለበት። ይኸውም በውስጠ ወይራ ነገር ምስጢሩን በቶሎ የማይገኝ አድርጎ ማመስገን ኾነ ማማት አማርኛ ለበስ ወይም ሙሻ ዘር አድርጎ ውስጠ ምስጢር ነገርን መናገር ነው።

    ምንጭ
    ከሣቴ ብርሃን ተሰማ የአማርኛ መዝገበ ቃላት (ተሰማ ሀብተ ሚካኤል ግጽው)
  • loader Loading content ...
  • ደራሲ አለማየሁ ሞገስ በ1957 ዓም ለማስተማሪያነት እንዲውል ባሳተሙት "የድርሰት አብነት" በተሰኘው መፅሃፋቸው   የደኅንነት መግለጫ ደብዳቤ ምን ይመስላል የሚለውን ለማሳየት የሚከተለውን ምሳሌ ፅፈዋል። እንደኔ  አመለካከት፣ የመማሪያ መፅሃፍት ምሳሌዎች እንደዚህ አይነት 'በአንድ ድንጋይ ሁለት ወፍ' ማለትም ዋናውን ትምህርት እያስተማሩ ስለሀገራቸውም እውቀት እንዲያስጨበጡ ሆነው መቀረፃቸው በጣም ጠቃሚ ነው እላልሁ።
    ---

    ልውድ እናቴ ወይዘሮ ለምለም በኀይሉ!
    ከተለያየን እስካሁን እጅጉን እንደምን አለሽልኝ? ካንቺ እንደተለየሁ ከጓደኞቸ ጋር በተከራየሁት መኪና ሁኜ ሀገር እየጎበኘሁ በእየከተማው እያረፍሁ ሲመሽም ከጥሩ ሆቴል እያደርሁ በደህና ያላምንም እንቅፋት አስመራ ገብቻለሁ። ጉዞአችንም እንደሚከተለው ሲሆን በጣም አስደሳች ነበር።

    ጥቅምት ፲፪ ቀን ማክሰኞ ለት ከአዲስ አበባ ተነስተን እግረ መንገዳችንን ዝነኛው ገዳም ደብረ ሊባኖስን ጎብኝተን በስምንት ሰአት አባይ በረሃ ገባን። ወንዙ ጎርዶት የገባን ሊጠን ሆማ ገደል ግራ ቀኙን ገመገም ጋማት እያየን ካባይ ድልድይ ሳይታወቀን ደረስን። ከዚያም ከመኪናችን ወርደን ከድልድዩ ላይ ቁመን የገንገቡን ርዝመት የወንዙን ስፋት፣ የድልድዩን ጥርካሬና ውበት ዐየን። ጓደኞቸ የውኃውን ጥራት፣ የመልካውን ስፋት ለማየት በበሩ ሲወርዱ፣ እኔ ግን አዞ ይበላኛል፣ እናቴ ትቆጣኛለች ብሄ ካፋፉ ላይ ሁኜ ተመለከትሁ እንጂ አልወረድሁም። 

     የአባይን ጉብኝት ከጨረስን በኋላ ጉዞዋችንን ወደ ጎጃም ጠቅላይ ግዛት ቀጠልን። ደብረ ማርቆስ ገብተን አደርን። ብዙ ባሕር ዛፍ አለበት እንጂ ከተማው መጠነኛ ነው። በበነጋው ሁለት ሰዓት ሲሆን ደንበጫ ደረስን። በዚህ ጊዜ የመሬቱ አለሳለስ፣ የዛፍ ቅጠል የዕፅዋቱ ልምላሜ አእምሮዬን ለዋወጠውና በደስታ ሰከርሁ። ባልንጀሮቼም ይገርማል እንዲህም ያለ ሀገር አለ እንዴ እያሉ ይገረሙ ጀመር። ነጂውም፣ 'ተው ረጋ በሉ ገና አረንዛው ዳሞት መጀመሩ ነውና አገው ምድርና ባሕር ዳር ሳትደርሱ የማድነቅ ቃላችሁን አትጨርሱ' እያለ ይበልጥ መኖሩን እየነገረ ያስጎመጀን ጀመር። እውነትም ደንበጫን አልፈን እጅጋ በርሃ እንደገባን የወንዞቹን ብዛት፣ የምንጮችን ጥራት፣ የሀገሩን ለምለምነት፣ የዱሩን እንስሳ አውሬ፣ የደኑን መህሊነት፣ በእየሜዳው ያለውን ከብት ስናይ ጊዜ የምንናገርበት ቃል አጣንና እንዲያው ዕፁብ፣ ድንቅ እያልን የማታ ማታ ባሕር ዳር ገባን።

    ከዚህ ስንገባ ግን ያንኑ የሆነ ያልሆነውን የምንቀባጥርበትን ቃል ከላይ በተጠቀሱት አውራጃዎች ስለጨረሥን የአባይን ፏፏቴ፣ የጣናን ስፋት፣ የከተማዋን አቀማመጥ እያየን እውነት ገነት የምትባለው በመጻህፍት የምትነገረው ቦታ ይህችን ትመስል ይሆን እያልን እናሰላስል ገባን። እንዲያው ዐይን ዐይናችንን አፍጠን፣ አፍ አፋችንን ዘግተን በጣና ዳር ለዳር ስንናፈስ ከጓደኞቸ አንዱ አነሳና 'አሁን እኮ ይችን ሀገር ያላየ ሁሉ እግዚአብሔር ጥሩ ሀገር መፍጠር መቻሉን ሳያውቅ ነው የሚሞት' ቢል ካፉ ቀበል አድርገን ሁላችንም አዎን አዎን አልነው። እውነትም ባሕር ዳር ገነት ናት፤ እንዳትበርድ ቆላ ስትሆን፣ እንዳትሞቅ ደግሞ የጣና ባሕር ነፋስ አየሩን እየላከ እሽሩሩ ሲል ይኖራል። እኛም አንድ ቀን አድረን እንሄዳለን ብለን ያቀድነውን ትተን በፍቅሯ ታስረን ሦስት ቀን ሰነበትን። በመጨረሻም ጦነን እንደያዘው እየዞርን እያየን ባሕር ዳርን ትተን፣ ጣናን በሆናችን አድርገን የጎሪጥ እየተመለከትን ከዝነኛው የመካከለኛው ዘመን የኢትዮጵያ መናገሻ ጎንደር ገባን። በዚህም ሀገራችንን የሚያኮሩ በልዩ ልዩነገስተ ነገስት ዘመን የተሰሩ ግንቦች ዐየን፤ አብዛኞቹን ፎቶ ግራም ስላነሣኋቸው ስመጣ አሣይሻለሁ። የዚህን ከተማ ጉብኝትና ጥናት እንደጨረስን ጎዞችንን ወደ ስሜን አመራንና ዳባትና ደባርቅ የሚባሉትን ሁለት ከተሞች አልፈን የሊማሊሞን ብረሃ ጀመርነው። የዚህ በረሃ ሊጠንና ጋማት በዐይን እንጂ በወረቀትና በጽሕፈት ተገልጦ ሊረዳ አይቻልም። በዚህ ላይ የመኪና መንገድ መሰራቱ በጣም ይገርማል። የሰራውም የወንድ ወንድ ነው ለማለት ይቻላል። በረሃውን ጨርሰን ተከዜን ተሻግረን እለቱን ከዝነኛይቱ ጥንታዊት የኢትዮጵያ መናገሻ ከተማ አክሱም ገባን። በክርስቶስ ልደት አካባቢ የተሰሩትን በአለም የታወቁትን ረጃጅም ሐውልቶች እየዞርን ተመለከትን። ከእነዚህም ትንንሾቹ እንደቆሙ ሲገኙ ትላልቆቹ ደግሞ ወድቀዋል። ከሁሉም የሚገርመኝ በዚያ ከባድ ሸክም ማንሻ በሌለበት ዘመን እንዴት ሆነው መጀመሪያ እንደቆሙ ሳስብ ነው። በፅሁፍ የማያልቅ በቃል የሚነገር ብዙ ታሪክ በዚች ከተማ አለ።

    ስለአክሱም ሳሰላስል፣ መምህሬ 'አክሱምን ያላየ ኢትዮጵያን አያውቅም፣ ኢትዮጵያዊ ሆኖ ላሊበላን ያላየ ግን ጭንጋፍ ወይም የዱር እንስሳ ነው' ያለው ትዝ አለኝ እና ላሊበላን በእግሬም ሆነ በከብት ሳላየው አልመለስም ብዬ ቃል ገባሁ።  

    ከአክሱም በኋላ አድዋንና የሐን ጎብኝተን በመንደፈራ አድርገን አስመራ ገባን። ይህች ከተማ በጣም ጥሩ ናት። በእንግሊዝ ይዞታ በነበረችበት ጊዜ የሚያውቋት ሰዎች ኤርትራ ከእናት ሀገሩዋ ከኢትዮጵያ ጋር ከተቀላቀለች ወዲህ ከመቶ አምሳ ጨምራለች ይላሉ። እውነትም ይህ ይህ አሁን ነው የተሰራ እያሉ እያዞሩ አሳዩን። እኔ እንደምገምተው፣ ሌሎችም የኢትዮጵያ ከተማዎች ምሳሌ ለመሆን የምትችል ናት።

    ከዚህ የቀረውንና ተእንግዲህ የማየውን በሚቀጥለው ደብዳቤዬ እፅፍልሻለሁ። ስለኔ አታስቢ ፤ ነጂው አስተዋይ ስለሆነ ቀስ ብለን ባርባ በሰላሳ ሲሆን የምንሄደው፣ ከዘወርዋራ መንገድ ላይ ደግሞ ጥሩንባ እየነፋን ነው የምንፋስስ። እስከዚያው ደህና ቆይኝ እያልሁ በእግረ ኅሊና መጥቼ ጉልበትሽን እስማለሁ።
                               
                                        ከልብ የምናፍቅሽ፣ ልጅሽ፤
                                        ፊርማ
                                        መቅጫ አለማየሁ።
          
    ምንጭ    
    የድርሰት አብነት (አለማየሁ ሞገስ፣ 1957 ዓም የታተመ)። 
  • loader Loading content ...
  • ደራሲ አለማየሁ ሞገስ በ1957 ዓም ለማስተማሪያነት ባሳተሙት "የድርሰት አብነት" በተሰኘው መፅሃፋቸው  የቤተ  ዘመድ  ደብዳ ቤዎች መልክ እና ይዘት እንደሚከተለው አስቀምጠዋል።

    ማንኛውም ሰው ከወላጅ፣ ከዘመድ፣ ከጓደኛ፣ ከወዳጅ፣ ከዕውቂያ ተለይቶ በሩቅ ቦታ ሆኖ ለናፍቆት መግለጫና ለሐሣብ መለዋወጫ በፖሥታ፣ ወይም በመንገደኛ አማካይነት የሚልከው የወረቀት መልእክት የቤተ ዘመድ ደብዳቤ ይባላል። በዚህ ደብዳቤ ልክ ያ የሚወዱት ሰው በፊት እንዳለ አድርጎ በወረቀት ማውጋት ነው እንጂ መራቀቅ አያስፈልግም።

    የቤተ ዘመድ ደብዳቤ ልዩ ልዩ አይነት አለው።
    1. የደኅንነት መግለፃ - ማንኛውም ሰው ዘመዶቼ ይደነግጣሉ፣ ወዳጆቼ ይሰጋሉ ብሎ ጤንነቱን ለማስረዳት የሚፈጽመው መልእክት ሁሉ የደኅ መግለፃ ይባላል
    2. የዓመት በዓል - ክብረ በዓል ሲደርስ እንኳን ለዚህ አደረሰህ በማለት ደስታን ለመግለጥ የሚፃፍ መልእክት የዓመት በዓል ደብዳቤ ይባላል።
    3. የምስራች - አዲስ ነገር ሲገኝ፣ ሰው ሲሾም፣ ሴት ስትወልድ፣ ወታደር ከዘመቻ ሲመለስ፣ ለዘመድ ለወዳጅ የሚፃፍ ደብዳቤ የምስራች ይባላል።
    4. የጥሪ (የግብዣ) - ለሠርግ ፣ ለዓመት በዓል፣ ለዝክር፣ ለጠበል፣ ለክርስትና፣ ለጓድ ባንድ ቃል፣ ለማናቸውም ድግስ ለመጋበዝ የሚፃፍ መለእክት የጥሪ ወይም የግብዣ ደብዳቤ ይባላል። 
    5. የሐዘን (የመርዶ እና የማፅናኛ) - ማንኛቸውም ሰው ዘመድ ሲሞትበት ለማርዳት፣ ለማስረሳት፣ ለማጥናናት የሚፃፍ ደብዳቤ የሐዘን (የመርዶና፣ የማፅናኛ) ደብዳቤ ይባላል።
    6. የመውደድ - ጎረምሳና ኮረዳ፣ ጎልማሳና ሳዱላ ተቃራኒ ፆታቸውን ወደው ለስሜት መግለፃ የሚፃፃፉት መልእክት የመውደድ (የፍቅር) ደብዳቤ ይባላል። ፍቅር መንፈሳዊና የቤተ ዘመድ መፈቃቀር ጭምር ስለሚያሳይ ነው እንጂ የፍቅር ደብዳቤም ሊባል ይችላል።
       የቤተ ዘመድ ደብዳቤዎች ብዙውን ጊዜ የመግቢያ ክፍላቸውን በአክብሮት ስምና ቅፅል ማለትም አባቴ ፣ እናቴ፣ ወንድሜ እና እህቴ በሚሉት የአቅርቦት ስሞች የሚጀምሩ ሲሆን ባጠቃላይ የሚከተሉት ተመሳሳይ ይዘቶች አሏቸው።

    መጀመሪያ
    • ለውድ አባቴ አቶ እገሌ!
    • ለፍቅርት እህቴ ወይ/ እገሊት!
    • ለውድ እናቴ ወይ/ እገሊት!
    • ዘወትር ለምትናፊቂኝ እህቴ አታዬ እገሊት!
    • ለወድ ወንድሜ አቶ እገሌ!
    • ለፍቁር ወንድሜ አቶ እገሌ!
    • ለጠወደድሽ እህቴ ወይ/ እገሊት ወዘተ
    መፈፀሚያ 
    • ፍፁም ታዣዙ ልጅህ
    • ናፋቂው ልጅሽ
    • ያንተው ወንድም
    • ከልብ የማፈቅርሽ ልጅሽ
    • ዘለዓለም ያንቺው
    • ናፋቂ ወንድምሽ ወዘተ

    ምንጭ   
    የድርሰት አብነት (አለማየሁ ሞገስ፣ 1957 ዓም የታተመ)። 
  • loader Loading content ...
  • ደራሲ አለማየሁ ሞገስ በ1957 ዓም ለማስተማሪያነት ባሳተሙት "የድርሰት አብነት" በተሰኘው መፅሃፋቸው ደብዳቤን እንደሚከተለው ይገልፁና ምሳሌ የሚሆን ደብዳቤ እንደሚከተለው አስቀምጠዋል።

    ለሃሳብ መግለጫ ፣ ለደስታ ማብሰሪያ ፣ ለሀዘን ማስረጃ፣ ለችግር ማመልከቻ፣ ለትእዛዝ ማስተላለፊያ ሁሉ የሚፃፍ ፅሁፍ ሁሉ ዳብዳቤ ይባላል። ሶስት ዋና ዋና ክፍሎች ማለትም መግቢያ፣ ሐተታ ፣ እና መደምደሚያ (መልካም ምኞት) ይኖሩታል።በእነዚህ በሶስቱ ክፍሎች በመግቢያው ሰላምታ ። በሐተታው የደብዳቤው ፍሬ ነገር፣ በመደምደሚያው የመልካም ምኞት መግለጫ ተፅፎ ይደመደማል።

    ምሳሌ (ተማሪ ለአባቱ የፃፈው ደብዳቤ):
    ( ሰላምታ)
    ከልብ ለማፈቅርህ ውድ አባቴ አቶ ውቤ ተሰማ!
    ከተለያየንበት ቀን አንስቶ እስከ ዛሬ ድረስ እንደ ምን አለህልኝ፤ እኔ ካንተ ናፍቆት፣ ከእማዬ ውለታ፣ ከእህቴና ከወንድሜ ትዝታ በቀር የጎደለብኝ የለም፤ አምላክ ይመስገን ደኅና ነኝ።

    ( ሐተታ)
    ታኅሣሥ ፲፭ ቀን የላክልኝ ደብዳቤና የኪስ ገንዘብ ደርሶኛል። ውሬያችሁን አጥቼ ደብዛችሁ ጠፍቶኝ ተቸግሬ ሳለሁ ደኅንነታችሁን የምታበስረው ደብዳቤ ብትደርሰኝ ከሰማይ የወረደችና እናንተን ባካለ ስጋ የያዘች መስሎኝ ዐሥር ዐሥር ጊዜ መላልሼ እየሳምሁ አነበብኋት። በገንዘቡም እናትና አባቴን አቁምልኝ እያልሁ በዝጉ የማናበው የታሪክ መፅሀፍና ከክፍል የምማርበት የቁጥር መፅሃፍ ገዛሁበት፤ ወዲያውም ያልፃፍሁልህ የፈተና ጊዜ ስለ ነበር ውጤቱን ሳላውቅ ብየ ነው። አምና በሰኔ የመከርከኝን ተቀብየ ተስፋየን እየተጠባበቅሁ    ጠንክሬ ስላጠናሁ ሠላሳ አራት ልጆች ካሉበት ክፍል ሁለተኛ ወጣሁ። ለፋሲካና ለዓመቱ መጨረሻም አንደኛ እንደምሆን ፍጹም ተስፋ አለኝ።  ትምህርት  ቤታችን  የሚዘጋው  ታኅ ሥ  ፳፯  ቀን  ስለሆነ  ናን  ከእና ንተ  ጋር  ለመዋል  በአ ውቶብስ  የገሃድ  ለት  እመጣለ

    (መደምደሚያ፣ መልካም ምኞት)
    ከዚህ የቀረውን በዐይነ ስጋ እየተያየን ለመጨዋወት ያብቃን።
                                  ናፋቂ ልጅህ፣
                                  ዓለሙ ውቤ።
    ምንጭ  
    የድርሰት አብነት (አለማየሁ ሞገስ፣ 1957 ዓም የታተመ)። 

    (በድሮ ጊዜ የነበሩ እና አሁን አሁን እየቀሩ ያሉ የደብዳቤ ይዘቶች፣ እንዲሁም እስካሁንም ድረስ እየተጠቀምንባቸው ያሉትን የደብዳቤ አይነቶች እና በዚሁ መፅሃፍ የተጠቀሱ የምሳሌ ደብዳቤዎች በሌላ  የሰዋሰው  መጣጥፍ   ለማካፈል  እሞክራለሁ )
  • loader Loading content ...
    • አርእስት (የመፅሃፍ ስም አርእስት ይባላል። (በድርሰታችን ውስጥ ልንገልጠው  የምንፈልገው ዋና ሃሳብም አርእስት ይባላል
    • አጎላማሽ - ከገበታው አንስቶ እስከ መቅድሙ ድረስ የሚፃፈው ትርኪ ምርኪና ግስንግስን አጎላማሽ ይባላል።
    • መቅድም - ቅደመ ከሚለው ግስ የመጣ ስለሆነ ፍቺው ቀዳሚ፣ በፊት፣ ደራሽ ማለት ነው። መፅሃፉ የተፃፈበትን ዋና አላማና ምክንያት ባጭሩ የሚያስረዳው ክፍል መቅድም ይባላል።
    • መግቢያ - ደራሲው በመፅሃፉ ውስጥ አስቸጋሪና አዲስ ነገር መስሎ የሚታየውን ሁሉ ባጭሩ የሚገልጥበት ክፍል መግቢያ ይባላል።
    • እናት - ይህ ቃል ብዙ ትርጉም አለው። አንስታይ ወላጅ፣ ዋና ምንጭ፣ የነገር ጀማሪ። ከዚህም ዋነኛው ክፍል ማለትም መቅድም ፣ መግቢያ፣ ማውጫ፣ በግራና በቀኝ ተነስቶለት ከመካከል የሚቀረው እናት ወይንም እናቱ ይባላል። ዋናው ማለት ነው። በሌላ አነጋገር ሐተታ ነው።
    • መግለጫ - ለእያንዳንዱ ምእራፍ ለመግቢያ የሚሰጠው ሐተታ መግለጫ ይባላል።
    • ምዕራፍ - አዕረፈ ከሚለው የመጣ ዘር ስለሆነ ማረፊያ መፅሃፉን በየማረፊያው የምንከፍልበት እርከን ምእራፍ ይባላል።
    • ክፍል - ምእራፍ በክፍል ይከፋፈላል። ፍቺውም ክፍያ ፣ መክፈያ ማለት ነው።
    • አንቀፅ - እንደ ሰንሰለት ተያይዘው ስላንድ ሀሳብ የሚያስረዱ ዐረፍተ ነገር ተጀምረው ሲፈፀሙ አንድ ዓንቀጽ ይባላል። ይህውም ለእንግሊዝኛው ቃል paragraph ተወዳዳሪ መሆኑ ነው።  ሁለተኛው በህግ ምእራፍና ንዑስ ክፍል ማለት ይሆናል። ሶስተኛው ደግሞ article ለሚለው የፈረንጅ ቃል ተወዳዳሪ ነው።
    • ኀይለ ቃል - በአንድ አንቀፅ ውሥጥ ያለው ዋናው አረፍተ ነገር ኀይለ ቃለ ይባላል።

    ምንጭ 
    የድርሰት አብነት (አለማየሁ ሞገስ፣ 1957 ዓም የታተመ)። 
  • loader Loading content ...
    • መጽሐፍ - ብዙ ጥራዝ አንድነት ተሰብስቦ፣ ተጠርዞ በገባታ ወይንም በገበር ተጠቅሎ ላንባቢ ሲቀርብ መጽሐፍ ይባላል።
    • ገበታ - ብዙ ትርጉም አለው። ዋልታ፣ ዋዲያት፣ ማዕድ፣ የእንጨት ቀለምሻሽ፣ ሰዴቃ፣ በመጽሐፍ ጎንና ጎን የሚገኝ ከእንጨት የተጠረበ ወይንም ከወፍራም ክርታስ የሚሰራ ሥሥ ሳንቃ ነው።
    • ገበር - ብዙ ትርጉም አለው። በመጽሐፍ ግን ከገበታው ለጥቆ በመፅሃፉ ዳርና ዳር ለመሸፈኛ ተብሎ ሳይፃፍበት የሚቀረው ወረቀት ወይንም ብራና ገበር ነው። 
    • ድጉስ - ደጎሰ ካለው የመጣ ሲሆን፣ እንዳነባበቡ ዘመድ፣ ዘርና ሳድስ ቅፅል ለመሆን የሚችል ቃል ነው። በመፅሃፍ ግን ገበታው የባህር አረብ ለብሶ ሐረግ ሲሳብበት ድጉስ ይባላል።
    • ልባስ - መፅሃፉ እንዳይቆሽሽ የሚደረግለት መከላከያ ሱቲ ግምጃ ልባስ ወይንም ሽፋን ይባላል።
    • ቅፅ - የመፅሃፍን ማነስና መተለቅ የሚያሳየው መጠን ቅፅ ይባላል። ስለዚህም እንደ ስንክስራ ያለ በ2፣ በ3 ቅፅ የሚፃፍ ትልቅ መፅሃፍ በተከታታይ ቅፅ ተፃፈ ይባላል።
    • ርኁብ - ተራበ ከሚለው ግስ የመጣ ሲሆን የሚያሳየውም አንድ ነገር ወርዱ ሰፍቶ ቁመቱ ረዝሞ ጎድኑ መሳሳቱን ነው።  የመፅሃፉ ቅፅ ተልቆ ትራዙ አንዞ እንደ መፅሄት ሲሆን ርኁብ ይባላል።  ይህውም ስልግብ፣ ሰልጋባ፣ ስስ ማለት ነው።
    • ጥጉብ - ጠገበ ከሚለው የመጣ ሲሆን የሚያሳየው መወፈርንና መጎጠርን ነው። ቅፁ አንሶ ጥራዙና ገፁ በዝቶ መፅሃፍ ሲኮችር ጥጉብ ይባላል።
    • ብራና - ከቆዳ የተፋቀ፣ ለመፃፊያ የሚያገለግል ነገር ሁሉ ብራና ነው። ባንድ ቅፅ የታጠፈ 4 ገፅ ያለው ብራና አንድ ብራና ይባላል።
    • ሉህ - ሎሀ፣ ፃፈ ከሚለው የመጣ ስለሆነ ሉህ ወይም ለውህ መፃፊያ ማለት ነው። ከብራና ጋር የሚለየው የቆዳና የወረቀት መሆኑ ነው እንጂ ተመሳሳይ ናቸው። በ2 ቅጠል  4 ገፅ ያለው ወረቀት ሉህ ይባላል።
    • ክንፍ - ወይም ቅጠል የሉህ ግማሽ ክንፍ ወይም ቅተል ይባላል።
    • ዐምድ - ገፅ ከላይ ወደታች ከሁለት፣ ከሶስስት፣ ወዘተ ሲከፋፈል ዐምድ ይባላል። መፅሃፍ እንደ ቅፁ መተን ሁለት ወይም ሶስት አምድ ሊኖረው ይችላል። ጋዜጣ ኝ ከአራት እስከ ስምንት ያለው ይገኛል።
    • ጥራዝ - ጠረዘ፣ ሰብስቦ አሰረ ከሚለው ግሥ የመጣ ዘር ነው። አራት ወይም አምስት ብራና ሎህ በቅፅ ተቀፅቶ፣ በሲር ተያይዞ ሲቀመጥ ጥራዝ ይባላል።
    • ጠርዝ - በመፅሃፍ መክፈቻ በኅላፍና በግልየት በኩል የሚገኘው ዳርቻ ጠርዝ ይባላል።
    • ደንደስ - በመጠረዣ በኩል ያለው የመፅሃፍ ጀርባ ደንደስ ይባላል። ጠርዝና ደንደስ እርስ በርሳቸው ተቃራኒዎች ናቸው።
    • ክፈፍ - ጠርዝንና ደንደስን ትቶ የመፅሃፍ ላይኛውና ታችኛው ጫፍ ነው።
    • ቅፋፍ - ቅፁ አጓጉል ሲሆን እየተቆረጠ የሚወድቀው ብራናና ወረቀት ነው። የመጣውም ቀፈፈ፣ ትርፉን እየቆረጠ ጣለ ከሚለው ግስ ነው።
    • እፋፍ - አፈፈ ፣ የመፅሃፍን ጠርዝና ክፈፍ አስተካከለ ማለት ነው። እፋፍ መፅሃፍ ከተጠረዘ በኋላ ክፈፉ ሲስተካከል ዙሪያውን እየታፈፈ የሚወድቅ ፍቅፋቂ መሳይ ብጭቅጫቂ ወረቀትና ብራና ነው።
    • ኮተተ - የገበታ ዳርና ዳር በቆዳ ተሸፍኖ ሲጠረዝ ኮተት ይባላል። ግሱም ኮተተ ነው።
    • ቶታን - ድጉስን ወይም ኮተትን ለመያዝ በአርእስትና በህዳግ በኩል ለጥራዙ መጥለፊያ የሚመላለሰው ዝምዝም ቶታን ይባላል። ግሱም ቶተነ ነው።
    • ሲር - ጅማት ፣ ፈትል፣ ክር፤ ቶታንንና ጥራዝን የሚያጣልፈው እንዳይነቱ ሲር። ጅማት፣ ፈትል፣ ክር ይባላል።
    • አርእስት - ራስና፣ በራስጌ በኩል የሚገኘ ማለት ሲሆን፣ ከመፅሃፉ በስተላይ የሚገኘው ባዶ ቦታ አርእስት ይባላል።
    • ኅዳግ - ከመፅሃፉ በስተግርጌ ለእጅ መዋያ የሚተወው ባዶ ቦታ ኅዳግ ይባላል።
    • ኅላፍ - ከመፅሃፉ በስተግራ በኩል ከላይ ወደ ታች የሚወርደው ያልተፃፈበት ባዶ ቦታ ኅላፍ ይባላል።
    • ግልየት - ገለየ ፣ ገለበጠ ከሚለው ግስ የመጣ ሲሆን፣ ከመፅሃፉ በስተቀኝ በመገልበጫው በኩል ከላይ ወደ ታች የሚወርደው ባዶው ወረቀት ግልየት ይባላል።
    • ሐውልት - በአምዱ እና በአምዱ መካከል የቆመው ክፍት ቦታ ሐውልት ይባላል።
    • ምስማክ - ሰመከ፣ ተጠጋ ከሚለው ግስ የመጣ ሲሆን፣ በስተመጨረሻው በኩል ያለው ያልተፃፈበት ግራና ቀኙ ባዶ ቦታ ነው።
    • ሲራክ - ሴረከ፣ ተጠበበ ከሚለው ግስ የመጣ ሲሆን፣ የሆሄው እግር የሞቆምበት መሳፈቾው የሚሄድበት በብራና መንገድ፣ በወረቀት ኝ ጥቁር ገመድና ማተብ መስሎ በሉህ ዳር እስከ ዳር አግድም ተዘርግቶ የሚታየው ንድፍ ሲራክ ይባላል።
    • መስመር - ከሲራክና ከፍኖት መካከል ያለው ቀለሙ የሚወድቅበት ክፍት ቦታ መስመር ይባላል።
    • ፍኖት - በመስመር እና በሲራክ መካከል ያለው ትርጊያ መንገድ መሳይ ክፍት ቦታ ፍኖት ይባላል።
    • ኆኅት - በሆሄና ሆሄ መካከል ያለው ክፍት ቦታ ኆኅት ይባላል።
    • ሕፅን - ባንድ ሆሄ ጉያ መካከል የሚገኘው ክፍት ቦታ ሕፅን ይባላል። ለምሳሌ "ሀ፣ ሐ፣ ጠ ፣ በ፣ ሠ" እነዚህ ፊደላት ጉያ ውስጥ የሚገኘው ክፍት ክፍት ቦታ ሕፅን ይባላል።
    • ማሕፀን - የሐፀን ባእድ ዘር ስለሆነ ካንዶ ሆሄ ጉያ ውስጥ መውጫ የሌለው ክፍት ቦታ ማሕፀን ይባላል። ለምሳሌ "ቀ፣ ወ፣ ዐ፣ የ" ወዘተ።
    • ቅሣር - በቁም ፅህፈት ለጥሩ ፅህፈት ጌጥ እንዲሆንለት በራስ በእግሩ በክንፉ የሚጨመርለት ዘሃ የመሰለ ጭረት ቅሣር ይባላል።
    • ሠንጠረዥ - በዘለንጋና በዘረን እየከፈለ ረዥም ሥራን የሚያሳይ ሰሌዳ።
    • ዘለንጋ - በሠንጠረዥ ላይ አግድም የሚሄደው መስመር ዘለንጋ ይባላል።
    • ዘረን - በሠንጠረዥ ላይ ቁልቁል የሚወርደው መስመር ዘረን ይባላል።
    • እልባት - አለበ፣ ምልክት አደረገ ከሚለው የመጣ ዘር ነው። ትርጉሙም ምልክት ማለት ነው። አንባቢ ሁሉ ሲያነብ ቆይቶ የደረሰበት እንዳይጠፋው የሚደረገው ምልክት ፈትል ክር፣ ወረቀት፣ ሲር፣ ወዘተ እልባት ይባላል።

    ምንጭ
    የድርሰት አብነት (አለማየሁ ሞገስ፣ 1957 ዓም የታተመ)።
  • loader Loading content ...
  • ገሶ ማለት ከብረት የሚሰራ እንደ አካፋ ያለ የአፈር መዛቂያ ፣ መበተኛ ነው።

    ምንጭ
    ከሣቴ ብርሃን ተሰማ የአማርኛ መዝገበ ቃላት (በተሰማ ሀብተ ሚካኤል ግጽው)
  • loader Loading content ...
    Load more...
loader Loading content ...

Comments (3)


loader Loading content ...